Esti añu 2010 que ta acabando dexónos na nuesa zona galaicu-astur-l.lionesa muitas novedades. Entre el.las ta'l nacimientu de varios blogues: Babia. Las montañas y sus pueblos, Outurelos, Parque Natural dos Ancares, Valdeferreiros. Ibias.Asturias, el cabeiru n'apaecer esti añu, Muchos piensan........... Ibias, ya esti que tais l.leendo. Xunto con aquel.los más veteranos, ya caún a la súa manera, contribuin a que esti requeixu nun tea tan esqueicíu. Ya muitas veces pensaremos que tamos dando voces nuna braña, peru hai muita xente escuitando. Yía casi seguru que entre los que l.leen estos blogues nun tán los responsables (políticos ou económicos) del abandonu xeneral que sufre desde hai sieglos esta parte'l mundu. Peru non por esu vamos tar cal.laos. A la escontra, tien que valinos, con más motivu, pa seguir na l.luita pola nuesa tierra, pol sóu pasáu (pa que nun esqueizamos d'óu vinimos), pol sóu presente (que yía lu que vivimos) ya pol sóu futuru (que yía lu que dexaremos).
Peru nun sólu de blogues vive l'home, nin la mucher. Esti 2010 que ta dando las boquiadas dexónos además trés l.libros d'autores de la zona: Ibias. Guía completa., de la infatigable María del Roxo, Burning, veneno del rock, de Carlos de Valdés (autor del blogue The Constant Sorrower) ya el l.libru de poesías "Suenos" (CH Editorial), de Rosa Cunqueira, que ta a la venta, pol momentu, n'El Rincón Cunqueiru (Trabáu) ya la l.libreria Treito de Cangas del Narcea, fayéndo-l.ly feroz competencia a la guía d'Ibias.
A tous el.los, norabona pol l.labor feitu ya que'l prósimu 2011 siga trayéndonos muitas más cousas d'esti estilu. Ya a los que n'alguna ocasión visitanon esti conxuntu'i palabras más ou menos axeitadas chamáu País Cabreiru (2.150 visitas hasta'l día de güei), que l'añu que vien vos traiga aquel.lu que más queráis.