miércoles, 19 de diciembre de 2012

El Parque ya la Reserva (outra vez más de lu mesmu)

Val.le'i Tixeirúa
Yía posible que dalgunos de los qu'aparáis por aiquí de vez en cuandu vos alcordéis d'una riestra d'entradas sobre'l Parque Natural de las Fontes del Narcea, Degaña ya Ibias ya la Reserva de Muniel.los, las súas l.leis  ya la actitú del Principáu pa dar pouca voz  ou nenguna a los propietarios afeutaos, ya cúmu  fonon escluyíos del Patronatu de la Reserva los propietarios ya vecinos de Valdebóis ya La Viliel.la, asegún dixo en mayu del 2006 l'entoncias consecheiru de Mediu Ambiente, "pa cumplir cona l.legalidá". Nesas declaraciones, el consecheiru dicía que, no Patronatu, unu de los dous puestos de l.libre designación (ou sía, dixitales), podía tar acupáu por un vecín ou propietariu, palabras que se l.levóu l'aire, cumu tantas outras, xunto conas propuestas vecinales. La única variación vieno hai poucos días, cuandu se modifica la composición del Patronatu pola reestructuración del organigrama del Principáu. Estu nun  quier dicir más que xiringar tou pa que tou siga igual.
Naquel ya l.lonxanu 2006, la entoncias oposición política no ayuntamientu cangués punxo na Unión Europea un recursu sobre la representación de los propietarios no Patronatu de la Reserva, recursu del que nunca más se supo, ya agora que ta no gobiernu, paez que perdienon tou l'interés nél.

Fungudín-Veiga La Roza-La Perdiguera-El Garabal
Fai poucu más d'un mes,el Principáu presupuestóu 200.000 € pa oubras na Reserva de Muniel.los, destinaos a reparaciones nas pontes de la ruta a las l.lagunas, na casa de Las Tablizas ya no Centru d'Interpretación d'Oubachu, ya la l.limpieza de sendeiros. Agora bien: ¿tán incluyíos nesos sendeiros "de Muniel.los" los caminos del monte de La Viliel.la ou sólu la ruta turística? ¿Rozarán (una vez más) sólu la caxa del proyeutu Cecos-L.larón ou tomaránse en seriu que yía bonu tener l.limpios esos caminos pa tratar d'estinguir con más facilidá los incendios que puedan producise? Nun ta de más recordar que'l mesmísimu multidireutor de la Reserva de Muniel.los dixo esti pasáu abril qu'a las zonas queimadas a primeiros d'esi mes nun podían pasar los vehículos de las brigadas...

No que cinca al Parque Natural, conocimos que'l Principáu vei modificar el Plan Reutor d'Usu ya Xestión (PRUX), que piensa cuntar pa el.lu cona participación de tólos afeutaos, ya que la Parroquia Rural de Leitariegos vei tener representación na Comisión Reutora pol arrenunciu al sou favor d'unu de los puestos que correspondían al Ayuntamientu de Cangas. Peru nun  paez que vaiga haber novedaes respeutu a los seis "representantes" na Xunta del Parque de los titulares de dereitos afeutaos, que seguirán siendo quitaos ya puestos polos alcaldes al sou caprichu ya interés.

Caminando pol monte de La Viliel.la
Nesi sentíu, la direutora xeneral de Recursos Naturales, en declaraciones a Onda Cero (entre los minutos 10:19 a 14:24), falaba de tener en cuenta las propuestas vecinales ya estudiar el permitir ampliar las visitas a Muniel.los a más de 20 personas, n'outras condiciones más restrinxidas. Yera una bona oportunidá pa que esas visitas que nun pueden yir por Las Tablizas se fixeran polos montes de Valdebóis ya La Viliel.la pa enseñar outra parte de la Reserva.

Confío entre poucu ya nada en que los nuesos políticos tean pol l.labor de facé-l.lys casu a las alegaciones de los vecinos (la esperiencia, nesti casu, foi una bona mayestra pa mi). Anque, cumu dicía'l ciegu, veremos...